Daut Haradinaj, i AAK’së, nuk ka treguar për numrin e saktë të ulëseve në Kuvend që partia e Ramush Haradinajt i ka fituar në zgjedhjet e 11 qershorit.

Haradinaj gjatë një intervistë në Klan Kosova ka treguar vetëm se AAK dhe NISMA janë të kënaqur me numrat e mandateve të fituara në Kuvend.

“Nuk po flas për numra. Por jemi të kënaqur. AAK është e kënaqur me këtë rezultat”, tha ai.

Por, Daut Haradinaj nuk ka komentuar nëse edhe PDK’ja është e kënaqur me numrin e ulëseve për deputet të fituara brenda koalicionit PDK-AAK-NISMA.

“Këtë pyetje duhet me ju bo atyne”, tha ai.

Haradinaj gjatë intervistës tha se ai kishte pasur përgjegjësi që në këto zgjedhje të merrej me votuesit e koalicionit PAN në Deçan, si drejtues i degës së AAK’së në këtë komunë, dhe thotë se atje ka rritur konsiderueshëm mbështetjen e qytetarëve.

Ndryshe, koalicioni fitues i zgjedhjeve PDK-AAK-NISMA, sipas rezultateve preliminare të KQZ, rezulton t’i ketë fituar 39 vende në Kuvend.